فائونڈر ز گروپ کے سرگرم رکن ،پاکستان سٹون ڈویلپمنٹ کمپنی کے بورڈ آف ڈائریکٹر کے رکن ، سینئر نائب صدر فیروز پور روڈ بورڈاورسابق ممبر لاہور چیمبر آف کامرس خادم حسین نے کہا ہے کہ چین ہمیشہ سے پاکستان کا قابل اعتماد، اسٹریٹجک اور مضبوط سرمایہ کار شراکت دار رہا ہے ،
پاکستان کو چین سے زرعی، صنعتی اور معدنی شعبوں میں باہمی اشتراک کر کے ٹیکنالوجی کے حصول پر توجہ مرکوز کرنی چاہئے ،اگر چین کی تکنیکی مہارت اور سرمایہ جو سی پیک کے ذریعے پہلے ہی مضبوط بنیاد رکھتا ہے ان اہم شعبوں میں مرکوز کیا جا ئے تو اس کا نتیجہ صرف تجارتی و معاشی ہی نہیں بلکہ پاکستان کی مجموعی ترقی کی سمت کو بھی ازسرِنو متعین کرنے والا فیصلہ کن اثرات کا حامل ہو سکتا ہے۔
اپنے بیان میں انہوں نے کہا کہ مختلف شعبوں کی استعداد کار میں اضافہ اور انفراسٹرکچر کے نفاذ میں چین کا ریکارڈ قابل تعریف ہے۔ اب جب سی پیک کا اگلا مرحلہ صنعتی تعاون اور پائیدار ترقی کو ہدف بنا رہا ہے، زرعی اور معدنی شعبے میں یہ نئی توجہ اس راہداری کو ایک حقیقی کثیر جہتی معاشی فریم ورک میں وسعت دے سکتی ہے ، ہماری ساری توجہ اپنی استعدد بڑھانے پر مرکوز ہونی چاہیے تاکہ ہماری معیشت کو پائیدار ترقی مل سکے۔
