بلوچستان سرمایہ کاری بورڈ کے وائس چیئرمین بلال خان کاکڑ نے کہا ہے کہ صوبہ قدرتی وسائل، طویل ساحلی پٹی، جغرافیائی اہمیت اور دلکش سیاحتی مقامات کے باعث ایک علاقائی تجارتی مرکز بننے کی مکمل صلاحیت رکھتا ہے۔ایک بیان میں انہوں نے کہا کہ صوبائی حکومت بلوچستان کو سرمایہ کاری اور تجارت کا مرکز بنانے کے لیے سنجیدہ کوششیں کر رہی ہے،ہم صوبے کے صنعتی، زرعی، ماہی گیری، توانائی، لائیو سٹاک اور سیاحت کے شعبوں میں موجود بھرپور مواقع سے فائدہ اٹھانے کیلئے سرگرم عمل ہیں۔انہوں نے کہا کہ بلوچستان کے قدرتی وسائل، زرخیز زمین اور 770 کلومیٹر طویل ساحل ملکی و غیر ملکی سرمایہ کاروں کیلئے بے مثال مواقع فراہم کرتے ہیں۔
گوادر بندرگاہ کی ترقی اور پاک چین اقتصادی راہداری (سی پیک) کے ذریعے علاقائی روابط میں مزید بہتری آ رہی ہے، جس سے صوبے کی تجارتی اہمیت دوچند ہو گئی ہے۔بلال خان نے کہاکہ زیارت کے پہاڑوں سے لے کر مکران کے خوبصورت ساحلوں تک بلوچستان کی قدرتی خوبصورتی کو اجاگر کرتے ہیں، اگر سیاحتی ڈھانچے کی ترقی اور مؤثر پالیسی سازی کی جائے تو سیاحت ایک منافع بخش شعبہ بن سکتا ہے۔ انہوں نے قومی و بین الاقوامی سرمایہ کاروں اور پالیسی سازوں پر زور دیا کہ بلوچستان کو صرف وسائل کی سرزمین نہیں بلکہ مواقع اور پائیدار ترقی کے خطے کے طور پر دیکھیں۔ انہوں نے یقین دہانی کرائی کہ سرمایہ کاری بورڈ سرمایہ کاروں کو مکمل سہولیات فراہم کرنے کے لیے پرعزم ہے۔
