راولپنڈی: شہید انسپکٹر محمد عمران عباس کی نماز جنازہ پولیس لائن ہیڈ کوارٹرز میں ادا کر دی گئی،پولیس کے چاق و چوبند دستوں نے شہید انسپکٹر کے جسد خاکی کو سلامی پیش کی،نماز جنازہ میں وفاقی وزیرداخلہ شیخ رشید احمد،ڈسٹرکٹ سیشن جج راولپنڈی، آر پی او راولپنڈی عمران احمر، سی پی او راولپنڈی محمد احسن یونس، حساس اداروں کے افسران، ڈپٹی کمشنر راولپنڈی انوارالحق، ایس ایس پی آپریشنزشعیب محمود، ایس ایس پی انوسٹی گیشن محمدفیصل، چیف ٹریفک آفیسر راولپنڈی رائے مظہر اقبال،ڈی پی او اٹک خالد ہمدانی، ڈویژنل ایس پیز، دیگر سینئر پولیس افسران، اہلکاروں اور شہریوں نے ہزاروں کی تعداد میں شرکت کی۔
نماز جنازہ کی ادائیگی کے بعد شہید انسپکٹر عمران عباس کی تدفین آرمی قبرستان، ریس کورس میں سرکاری اعزاز کے ساتھ کردی گئی،انسپکٹر محمد عمران عباس گزشتہ روز شرپسند عناصر کی فائرنگ سے شہید ہو گئے تھے،واقعے کا مقدمہ پولیس کی مدعیت میں تھانہ سول لائنز درج کیا گیا ہے،سی پی اومحمد احسن یونس کاکہناتھاکہ دکھ اور مشکل کی اس گھڑی میں شہید کے لواحقین کے ساتھ کھڑے ہیں، انسپکٹر محمد عمران عباس شہید سب انسپکٹر کے بیٹے تھے،شہید انسپکٹر عمران عباس کے والد میاں عباس ایس آئی بھی 1990 میں شرپسند عناصر کا مقابلہ کرتے ہوئے شہید ہوئے تھے،شہید انسپکٹر محمد عمران عباس بہادر اور ملنسار آفیسر تھے ان کی محکمہ پولیس کیلئے قربانیوں کو کبھی فراموش نہیں کیا جاسکتا، شہریوں کے تحفظ کیلئے اپنی جانوں کا نذرانہ پیش کرنے والے پولیس افسران محکمہ پولیس کا فخر ہیں۔
(30)
