راولپنڈی/ اسلام آباد/گوجر خان، دینہ:مختلف واقعات میں 5افراد جان کی بازی ہار گئے، سواں پل پر ٹریفک حادثہ میں دوموٹرسائیکل سوار جاں بحق ہوگئے۔
اے ایس آئی انصرمحمودنے بتایا کہ 20سالہ محمدریاض اور 25سالہ شیردل موٹر سائیکل پر سواں کیمپ کی جانب سے فوجی فاؤنڈیشن ہسپتال کی جانب جارہے تھے کہ سواں پل پر اپنے آگے جانے والے ایکسیویٹرکی عقبی سائیڈسے ٹکراگئے جس سے دونوں موٹرسائیکل سوار جاں بحق ہوگئے۔
دونوں کاتعلق ڈیرہ اسماعیل خان سے تھا اور وہ یہاں ماڈل ٹاؤن ہمک میں ایک فیکٹری میں کام کرتے تھے ۔ تھانہ بھارہ کہو کے علاقے ڈھوک موہری میں منگل کو 20 سالہ نوجوان نے بجلی کے کھمبے پر چڑھ کر خود کشی کر لی۔
پولیس کے مطابق عبدالرحمن ولد لطیف الرحمٰن کا ذہنی توازن درست نہیں تھا ، جو کھمبے پر چڑھ گیا جس سے اس کی موت واقع ہو گئی ، گوجر خان میں موٹر سائیکل کی ٹکر سے لڑکا جاں بحق ہو گیا جس کی شناخت عبدالحق قریشی کےنام سے ہوئی ۔ موٹرسائیکل سوار موقع سے فرار ہو گیا۔
ادھردینہ کے نواحی علاقہ میں نامعلوم افراد نے فائرنگ کر کے 45سالہ نمبردار کو قتل کر دیا۔ نواحی علاقہ شہامد پور باغاں کے نمبردار چوہدری اسد عباس جو راولپنڈی کچہری سے واپس آ رہے تھے پر لہڑی روڈ کے مقام پر نامعلوم افراد نے انددھا دھند فائرنگ کر دی ۔ ملزمان موبائل فون اور پرس ساتھ لے گئے، قتل کی وجہ معلوم نہ ہو سکی۔
(0)
