وزیراعظم محمد شہباز شریف نے کہا ہے کہ ملک سے پولیو کے مکمل خاتمے کیلئےشعبہ صحت کی ٹیم، پولیو ورکرز اور تمام متعلقہ ادارے پر عزم ہیں،پولیو کے خاتمے میں مشکلات ہیں مگر یہ ناممکن نہیں،پولیو مہمات میں پولیو ورکرز کا کلیدی کردار قابل تحسین ہے۔
منگل کو وزیراعظم آفس کے میڈیا ونگ کی طر ف سے جاری بیان کے مطابق وزیراعظم محمد شہباز شریف نے ان خیالات کا اظہار روٹری انٹرنیشنل فاؤنڈیشن کے صدر فرانسسکو اریزو کی سربراہی میں ملاقات کےلئے آئے وفد سے گفتگوکرتے ہوئے کیا۔ملاقات میں وفاقی وزیرِ صحت سید مصطفی کمال، وزیرِ اعظم کی انسداد پولیو کیلئے خصوصی نمائندہ عائشہ رضا فاروق اور متعلقہ اعلی حکام موجود تھے۔وزیراعظم نے روٹری انٹرنیشنل سے پولیوجیسے موذی مرض کے پاکستان سے خاتمے کیلئے باقی بین الاقوامی اداروں کی طرح بھرپور تعاون پراظہار تشکر کیا۔
