اکستان سٹاک ایکسچینج میں جمعہ کو شاندار تیزی کا رجحان دیکھنے میں آیا اور کے ایس ای-100 انڈیکس پہلی بار 1,41,000 کی سطح عبور کر گیا۔ مارکیٹ میں یہ مثبت پیش رفت امریکا اور پاکستان کے درمیان ہونے والے تاریخی تجارتی معاہدے اور پاکستان کے لیے درآمدی ٹیرف میں کمی کے اعلان کے بعد سامنے آئی۔ ابتدائی کاروباری اوقات میں انڈیکس میں کچھ دیر کے لیے 433 پوائنٹس کی کمی دیکھی گئی تاہم دوپہر 12 بجے کے بعد مارکیٹ نے تیزی سے مثبت رخ اختیار کیا۔ انڈیکس 483.07 پوائنٹس (0.35 فیصد) اضافے کے ساتھ 139,873.49 پر پہنچا۔ کاروبار کے اختتام تک یہ رجحان مزید مستحکم ہوا اور کے ایس ای-100 انڈیکس 1,644 پوائنٹس (1.18 فیصد) اضافے کے ساتھ 141,034.00 پوائنٹس پر بند ہوا۔یہ اضافہ گزشتہ روز کے 139,390 پوائنٹس کے اختتامی درجے کے مقابلے میں نمایاں بہتری کی عکاسی کرتا ہے۔
واضح رہے کہ 31 جولائی کو امریکی صدر ڈونلڈ ٹرمپ نے پاکستان کے ساتھ تجارتی معاہدے کا اعلان کیا جس کے تحت پاکستان پر عائد محصولات کی شرح کو 29 فیصد سے کم کر کے 19 فیصد کر دیا گیا ہے۔ یہ رعایتی ٹیرف 7 اگست 2025ء سے نافذ العمل ہوگا جس سے پاکستانی برآمدکنندگان کو امریکی منڈی میں مسابقتی برتری حاصل ہوگی۔پاکستان سٹاک ایکسچینج کے مطابق یہ رجحان ملکی معیشت میں بہتری، تجارتی اعتماد اور حکومت کی کامیاب سفارتی کوششوں کا مظہر ہے۔ سرمایہ کاروں کا اعتماد اس بات کی دلیل ہے کہ پاکستان عالمی منڈی میں دوبارہ اپنی جگہ مضبوطی سے بنا رہا ہے۔پاکستان سٹاک ایکسچینج مستقبل میں بھی ملکی اور بین الاقوامی سرمایہ کاروں کو محفوظ، شفاف اور فعال تجارتی ماحول فراہم کرنے کے لیے پرعزم ہے