ویسے تو گھروں میں اخبارات کو کچھ عرصے سے زیادہ سنبھال کر نہیں رکھا جاتا یا رکھ بھی لیا جائے تو ان کی حالت خراب ہو جاتی ہے۔
مگر برطانیہ کے ایک گھر کی الماری میں چھپا ایسا اخبار دریافت ہوا جو 112 سال پرانا تھا اور اس کی حالت اب بھی حیران کن حد تک اچھی ہے۔
یہ اخبار اس لیے بھی خاص ہے کیونکہ اس میں ٹائی ٹینک کے حادثے کے متاثرین کی حالت کی عکاسی کی گئی ہے۔
خیال رہے کہ 15 اپریل 1912 کو رات کے 2 بج کر 20 منٹ پر برطانیہ سے امریکا کی جانب اپنا پہلا سفر کرنے والا بحری جہاز ٹائی ٹینک نیو فاؤنڈ لینڈ کے ساحل سے لگ بھگ 400 میل دور برفانی تودے سے ٹکرا کر ڈوب گیا تھا۔
ٹائی ٹینک تیار کرنے والوں نے اسے کبھی نہ ڈوبنے والا جہاز قرار دیا تھا اور یہ اپنے عہد کا سب سے پرتعیش بحری جہاز بھی تھا۔
مگر یہ اپنے پہلے سفر کے دوران ہی بحر اوقیانوس میں غرق ہوگیا اور اس پر سوار ڈیڑھ ہزار افراد ہلاک ہوگئے۔
ٹائی ٹینک کا حادثہ جب سے لوگوں کے ذہنوں میں زندہ ہے اور اس کے بارے میں اکثر دلچسپ چیزیں سامنے آتی رہتی ہیں۔
یہ 112 سال پرانا اخبار 20 اپریل 1912 کا ہے جس کے صفحہ اول پر ساؤتھ ہیمپٹن کی 2 خواتین کی تصویر موجود ہے۔
اس برطانوی ساحلی شہر سے ہی ٹائی ٹینک اپنے سفر پر روانہ ہوا تھا اور اخبار میں دکھائی جانے والی خواتین حادثے میں بچ جانے والوں کی فہرست کی منتظر تھیں۔
اس اخبار کو Lichfield شہر کے ایک گھر کی صفائی کے دوران ایک الماری سے دریافت کیا گیا اور یہ وہاں ایک صدی سے زائد عرصے سے چھپا ہوا تھا۔
اخبار کے اندرونی صفحات میں ان افراد کی تصاویر شائع کی گئی تھیں جو اس بحری جہاز پر سوار تھے۔
Hansons Auctioneers نامی ادارے کی جانب سے اس اخبار کو نیلام کیا گیا۔
اس کی جانب جاری بیان کے مطابق اس اخبار کی دریافت ہمارے صارف کی دادی کی مہربانی سے ممکن ہوسکی۔
بیان میں بتایا گیا کہ وہ خاتون اہم واقعات کے اخبارات کو محفوظ رکھتی تھیں، جیسے بادشاہ جارج پنجم کی تاج پوشی اور ٹائی ٹینک کے ڈوبنے کا واقعہ۔
یہ اخبار 45 ڈالرز میں نیلام ہوا ہے اور اسے سماجی تاریخ کا ایک اہم حصہ قرار دیا گیا ہے۔