لندن؛ مقبول بٹ کے یوم شہادت پر انڈین ہائی کمیشن لندن کے باہر کشمیریوں نے بھرپور مظاہرہ کیا۔ بابائے قوم مقبول بٹ شہید ؒ کی 38 برسی کے موقع پربھارتی ہائی کمیشن لندن (یوکے) کے باہر برٹش کشمیریوں نے احتجاجی مظاہرہ منعقد کیا۔ اس موقع پر کشمیریوں نے بھارت کے خلاف نعرے لگائے۔
شہید کشمیر بابائے قوم مقبول بٹ شہید کی باقیات کی حوالگی کا مطالبہ کیا، بھارت نے کشمیری لیڈر مقبول بٹ شہید کو 11 فروری 1984 ء کو پھانسی دیکر میت کو تہاڑ جیل دہلی بھارت کے احاطہ میں ہی دفن کر دیا تھا۔
کشمیری آج تک شہید کے جسدِ خاکی کو انکے وارثوں کے حوالہ کرنے کی مانگ کرتے چلے آ رہے ہیں۔ تاکہ مزار شہداء سرینگر کشمیر میں اسلامی رسم و رواج کے مطابق عزت و احترام اور اعزاز کے ساتھ دفن کیا جا سکے۔
برٹش کشمیریوں کا احتجاجی مظاہرہ دن کے ڈیڑھ بجے سے لے کر شام ساڑھے چار بجے تک جاری رہا، اس موقع پر لندن میٹروپولیٹن پولیس بھی وہاں پر موجود تھی۔ کشمیریوں نے بینر، پوسٹر اور جھنڈے بھی اٹھا رکھے تھے جبکہ کشمیر کی آزادی کے حق میں نعرے لگا رہے تھے۔
(36)
